فیصل آباد (نیوز ڈیسک)فیصل آباد ڈویژن کے چاروں اضلاع فیصل آباد ،جھنگ ، ٹوبہ ٹیک سنگھ ، چنیوٹ سمیت دیگر اضلاع میںاکثر مقامات پر گندم کی کٹائی کاسلسلہ شروع ہو گیا ہے، اس ضمن میں فی ایکڑ ساڑھے تین من گندم مزدوری مقرر کر دی گئی ہے جبکہ مردوں کے ساتھ ساتھ خواتین اور بچے بھی درانتیاں تھامے کھیتوں کھلیانو ں میں اتر گئے ہیں۔ یو ا ین پی کے مطابق معلوم ہواہے کہ جن مقامات پر فصل مکمل طورپر پک جانے کے بعد گندم کی کٹائی کا آغاز ہواہے وہاں کاروباری و تجارتی سرگرمیاں نہ ہونے کے برابر رہ گئی ہیں اور بڑی تعداد میں محنت کشوں ، مزدوروں اور دیہاڑی دار ورکرز نے کھیتوں کھلیانوں کا رخ کرلیاہے۔ مذکورہ افراد کا کہناہے کہ چونکہ انہیںفی ایکڑ گندم کاٹنے پر ساڑھے تین من گندم بطور معاوضہ ملتی ہے لہٰذا وہ چند روز کے دوران گندم کی کٹائی مہم میں بڑھ چڑھ کر حصہ لیتے ہوئے سال بھر کا اناج اکٹھا کرلیتے ہیں۔ انہوںنے بتایاکہ انہوںنے عارضی طورپر ایسے بچوں جو سکولوں میں تعلیم حاصل کرتے ہیں کی بھی چھٹیاں حاصل کرلی ہیں جس کے باعث ان کے بچے بھی کٹائی میں ان کا ہاتھ بٹا رہے ہیں تاکہ جہاں ایک طرف کٹائی کا عمل بروقت مکمل ہو جائے وہیں انہیں زیادہ سے زیادہ مزدوری بھی حاصل ہو سکے۔