عمران خان سے لاہور کی معروف سیاسی شخصیات کی ملاقات ، پی ٹی آئی میں شمولیت کا اعلان کردیا
لاہور ( این این آئی) پاکستان تحریک انصاف کے چیئرمین و سابق وزیر اعظم عمران خان سے لاہور کی معروف سماجی و سیاسی شخصیات چوہدری سعید سدھو اور شفقت امین نے ملاقات کر کے ساتھیوں سمیت تحریک انصاف میں باضابطہ طور پر شمولیت کا اعلان کر دیا ۔ اس موقع پر مرکزی سینئر نائب صدر فواد چوہدری اور جیل بھرو تحریک کے فوکل پرسن و رہنما تحریک انصاف اعجاز چوہدری بھی موجود تھے۔جبکہ ملاقات میں سعید مشتاق،محمد یونس،محمد خالد، شاہد طالب، سلطان گولڈن اور منشا سندھو بھی موجود تھے ۔ سعید سدھو، شفقت امین اور وفد نے چئیرمین عمران خان کی قیادت اور تحریک انصاف کے منشور پر مکمل اعتماد کا اظہار کیا۔ وفد نے حقیقی آزادی کی تحریک پر مکمل اعتماد کا اظہار کیا،جیل بھرو تحریک کے حوالے سے اپنا بھرپور کردار ادا کرنے کا عزم بھی کیا۔چیئرمین تحریک انصاف عمران خان نے معروف سماجی و سیاسی شخصیات کی تحریک انصاف میں شمولیت کا خیر مقدم کیا۔
