نئی دہلی (نیوز ڈیسک) بھارتی وزیراعظم نریندر مودی نے کہا ہے کہ 2022 تک ملک سے لوڈشیڈنگ کا مکمل خاتمہ کردیا جائے گا۔ طلباءسے خطاب کرتے ہوئے نریندر مودی نے کہا کہ کامیابی کا کوئی مختصر راستہ نہیں ہے، صرف محنت سے ہی کامیابی حاصل کی جاسکتی ہے جبکہ اپنی ناکامیوں پر نظر رکھنے سے کامیابی کا طریقہ ملتا ہے۔ انہوں نے کہا کہ ملک کی خدمت صرف سیاست یا فوج میں شامل ہوکر ہی نہیں کی جاسکتی، اس کے اور بھی بہت سے طریقے ہیں، والدین کو چاہیے کہ وہ اپنے بچوں کے ذریعے اپنے خوابوں کی تعبیر حاصل کریں۔ انہوں نے کہا نوجوانوں کو ڈگری کے ذریعے نوکری حاصل کرنے سے آگے بڑھنا چاہیے اور شاعری و فن میں بھی نام بنانا چاہیے۔ انہوں نے طلبا کو ترکیب بتائی کہ اچھا مقرر بننے کے لئے پہلے اچھا سامع بنا پڑتا ہے۔ مودی نے کہا کہ نوجوانوں کو دوسروں کی مدد کرنا چاہیے، اس کے لئے کوئی قابلیت نہیں چاہیے مگر یہی کام انہیں لیڈر بنا دے گا۔