اسلام آباد (این این آئی) پاکستانی وزارت خارجہ نے کہاہے کہ کابل میں پاکستانی سفارتخانے پر حملے کی تحقیقات جاری ہیں اور ہم متعلقہ افغان حکام کے ساتھ رابطے ہیں۔میڈیا رپورٹ کے مطابق افغان عبوری حکومت کے رہنما ذبیح اللہ مجاہد کے ریمارکس پر پاکستانی وزارت خارجہ نے ردعمل دیتے ہوئے کہا کہ کابل میں پاکستانی سفارتخانے پر حملے کی تحقیقات جاری ہیں۔ترجمان وزارت خارجہ کے مطابق ہم تحقیقات کی قریب سے پیروی کررہے ہیں، سفارتخانے پر حملے کے معاملے پرمتعلقہ افغان حکام کے ساتھ رابطے ہیں۔ترجمان نے کہا کہ یقین ہے کہ ناظم الامور کو نشانہ بنانے والے حملے کی تحقیقات کی جائیں گی، یقین ہے قصور واروں اور معاونین کو قانون کے کٹہرے میں لایا جائے گا۔وزارت خارجہ نے کہا کہ پاکستان دہشت گردی کی لعنت سے لڑنے کے اپنے عزم پر قائم ہے۔