لاہور( این این آئی)پاکستان تحریک انصاف نے ملک کے موجودہ حالات میں انتخابات کو نا گزیر قرار دیتے ہوئے انتخابات کو التواء میں ڈالنے کی ہر کوشش کی بھرپور مزاحمت کرنے اورملک کی بدترین معاشی صورتحال اور ہوشربا مہنگائی کے خلاف عوام میں جانے کا فیصلہ کیا ہے،پی ٹی آئی ’’ الیکشن کرا ئوملک بچا ئو‘‘ کے عنوان سے

مہم شروع کر ے اور پہلا مرحلہ 7 دسمبر سے شروع ہو کر 17 دسمبر تک جاری رہے گا۔ ۔ پاکستان تحریک انصاف کے چیئرمین عمران خان سے لاہور سے تعلق رکھنے والے اراکین قومی و صوبائی اسمبلی نے ملاقات کی ۔ اس موقع پر پارٹی کی سینئر قیادت بھی موجود تھی ۔اجلاس میں شفقت محمود، حماد اظہر، میاں اسلم اقبال، فواد چودھری، ڈاکٹر یاسمین راشد ، محمود الرشید ، مسرت جمشید چیمہ سمیت دیگر شریک ہوئے۔ اجلاس میں ملک کی موجودہ سیاسی صورتحال، اسمبلیوں کی تحلیل اور آئندہ انتخابات کی تیاریوں کے حوالے سے تفصیلی تبادل خیال اور آئندہ کی حکمت عملی طے کی گئی ۔اجلاس میں ملک میں جاری مہنگائی پر تشویش کا اظہار کیا گیا اور فیصلہ کیا گیاکہ مہنگائی کے خلاف فوری احتجاجی مہم شروع کی جائے۔ذرائع کا کہنا ہے کہ عمران خان نے ارکان اسمبلی کو مہنگائی کے خلاف احتجاجی ریلیاں نکالنے کی ہدایت کی ہے اور اسی سلسلے میں پہلی ریلی سابق وفاقی وزیر حماد اظہر کے حلقے سے نکالی جائے گی۔ذرائع کا کہنا ہے کہ بتدریج ان ریلیوں کا دائرہ کار ملک بھر میں پھیلایا جائے گا اور دیگراحتجاجی ریلیوں کا شیڈول جلد جاری کیاجائے گا۔ پارٹی کی سینئر قیادت اور اراکین اسمبلی نے قومی و صوبائی اسمبلی کے ایوان سے استعفوں اور اسمبلی کی تحلیل کے چیئرمین عمران خان کے اصولی اعلان کی مکمل تائید کرتے ہوئے کہا کہ ملک کے موجودہ حالات میں فوری طور پر ملک میں قومی انتخابات کا صاف و شفاف انعقاد ناگزیر ہے ۔

انتخابات کو التوا ء میں ڈالنے کی ہر کوشش کی بھرپور مزاحمت کی جائے گی ۔اجلاس میں صاف شفاف انتخابات کے علاوہ کسی بھی ماورائے آئین و قانون حربے کو قبول نہ کرنے کا دوٹوک فیصلہ کیا گیا ۔ تحریک انصاف کے رہنمائوں نے کہا کہ مخدوش ترین معاشی صورتحال فوری فیصلہ سازی کی متقاضی ہے، طاقت کا سرچشمہ عوام اور آئین بالادست ہے، ۔

تبدیلی سرکار کے بھونڈے تجربے نے ملک و ملت کو بحرانوں کی دلدل میں دھنسا دیا ہے، ساکھ و صلاحیت سے محروم گروہ کو قومی فیصلہ سازی دے کر عوام کو قیادت کے انتخاب کے حق سے محروم کیا جارہا ہے، تحریک انصاف یکجا، یکسو اور متحد ہو کر اپنے قائد عمران خان کے پیچھے کھڑی ہے۔ذرائع کے مطابق اجلاس میں فیصلہ کیا گیا کہ ’’الیکشن کرا ئوملک بچا ئو‘‘ کے عنوان سے مہم کا آغاز لاہور سے ہوگا، مہم کا پہلا مرحلہ 7 دسمبر سے شروع ہو کر 17 دسمبر تک جاری رہے گا، مہم کے تحت لاہور میں 11 روز میں گیارہ ریلیاں اور اجتماعات کا انعقاد ہو گا۔پہلی ریلی 7 دسمبر کو حماد اظہر کے حلقہ میں ہوگی، ریلیوں میں مہنگائی، انسانی حقوق کی خلاف ورزیوں اور گرتی معیشت کے حوالے سے نکات اجاگر کئے جائیں گے۔