لاہور( این این آئی)پاکستان تحریک انصاف کے سینئر رہنما سینیٹر اعجاز چوہدری نے کہا ہے کہ پرویز الٰہی اور مونس الٰہی کا بیانیہ پی ٹی آئی مخالف ہے اس کا فائدہ پی ڈی ایم کو تو ہوسکتا ہے پی ٹی آئی کو نہیں،چوہدری صاحبان کی سیاست اسٹیبلشمنٹ کی مرہون منت ہے وہ انہیں بتا کر اور ان سے پوچھ کر سیاست کرتے ہیں،
پرویزالٰہی اورمونس الٰہی کے حالیہ بیانات نظریہ ضرورت کے تحت ہیں، چوہدری صاحب جو بھی چاہ رہے ہیں قوم دیکھ رہی ہے۔نجی ٹی وی کو انٹر ویو اور اپنے بیان میں اعجاز چوہدری نے کہا کہ ان کے بیانات ممکنہ طور پر نئی انتظامیہ کو پیغام ہے کہ ان کی طرف دیکھیں اور آشیر واد دیں،پرویز الٰہی اور مونس الٰہی کی باتیں پی ٹی آئی کے ورکرز اور ووٹرز کو بھلی نہیں لگ رہی۔چوہدری صاحبان کی ساری سیاست اسٹیبلشمنٹ کی مرہون منت ہوتی ہے، وہ سیاسی اقدامات بغیر پوچھے نہیں کرتے، پرویزالٰہی وہی فیصلہ کریں گے جو انہیں کہا جائے گا، چوہدری صاحب سے پوچھنا چاہیے کہ ان کی کون سی بات کو درست مانا جائے۔سینیٹر اعجاز چوہدری نے واضح کیا کہ پرویزالٰہی کا بیانیہ تحریک انصاف کے بیانیے سے متصادم ہے، وزیراعلی پنجاب ایسی باتیں نہ کریں جو سپورٹرز کو بھلی نہ لگ رہی ہوں،چوہدری صاحب کے لیے بہتر ہوگا کہ وہ اس طرح کے بیانات نہ دیں، (ق) لیگ کے بیانیے سے پی ڈی ایم کو فائدہ ہورہاہے۔انہوںنے دو ٹوک الفاظ میں کہا کہ تحریک انصاف اورعمران خان کا فیصلہ اٹل ہے،پرویزالٰہی ،مونس الٰہی کے حالیہ بیانات نظریہ ضرورت کے تحت ہیں،وہ پیغامات دے رہے ہیں کہ ہماری طرف دیکھیں۔پرویزالٰہی اور مونس الٰہی کے بیانات سے رائے عامہ کو مثبت پیغام نہیں جارہا، چوہدری صاحب جو بھی چاہ رہے ہیں قوم دیکھ رہی ہے۔انہوں نے وزیراعلی پنجاب کو دئیے گئے ووٹوں بارے سوال پر کہا کہ ہمیں تو کسی نے اشارہ نہیں دیا تھا،ہمارے ہی اراکین اسمبلی نے پرویز الٰہی کو ووٹ دیئے،پرویزالٰہی نے شکریہ ادا کرنا ہے تو عمران خان کاکریں جنہوں نے انہیں وزیراعلی بنایا۔
