ممبئی (آئی این پی) بالی ووڈ انڈسٹری کے سینئر اداکار وکرم گوکھلے تشویشناک حالت میں وینٹی لیٹر پر منتقل کر دیئے گئے۔

بھارتی میڈیا رپورٹ کے مطابق وکرم گوکھلے کی موت کی خبروں کی تردید کرتے ہوئے ان کی اہلیہ کا کہنا ہے کہ وہ کومہ میں چلے گئے ہیں اور انہیں تشویشناک حالت میں وینٹی لیٹر پر منتقل کر دیا گیا ہے۔اداکار کی اہلیہ نے بھارتی میڈیا کو بتایا کہ وکرم گوکھلے 5 نومبر سے دینا ناتھ منگیشکر اسپتال میں زیرِ علاج ہیں ان کے دل اور گردے ٹھیک طرح کام نہیں کر رہے۔سوشل میڈیا پر وکرم گوکھلے کے انتقال کی خبریں گردش کر رہی ہیں جس کی ان کے اہلِ خانہ کی جانب سے تردید کی جاچکی ہے ان کی بیٹی کا کہنا ہے کہ وہ زندگی اور موت کی کشمش میں ہیں اور انہیں دعائوں کی ضرورت ہے۔وکرم گوکھلے نے امیتابھ بچن کی فلم پروانہ سے اداکاری کی دنیا میں قدم رکھا جس کے بعد انہوں نے مشہورِزمانہ فلم اگنی پتھ اور ہم دل دے چکے صنم جیسی کئی فلموں میں اہم کردار ادا کیا تھا۔