لاہو ر( این این آئی) لاہور میں سکول جاتے ہوئے لاپتہ ہونیوالی طالبہ کی لاش نہر سے برآمد ہو گئی جبکہ دریائے راوی میں بھی ایک شخص ڈوب گیا ۔ پولیس کے مطابق دسویں جماعت کی طالبہ مناہل متین 12نومبر کو گھر سے سکول جاتے ہوئے لاپتہ ہوئی تھی ۔

جس پر اسکے اہل خانہ کی جانب سے پولیس تھانے میں درخواست دی گئی ۔ پولیس کے مطابق طالبہ کی لاش برکی نہر سے ملی ہے ۔موت کے حقائق جاننے کے لئے لاش پوسٹمارٹم کے لئے ہسپتال منتقل کر دی گئی ہے ۔ دوسری جانب چوہنگ کے قریب دریائے راوی میں ایک شخص ڈوب گیا ۔ اطلاع ملنے پر ریسکیو کے غوطہ خور موقع پر پہنچ گئے اور شہری کی تلاش شروع کر دی ۔دوسری جانب ایبٹ آباد سے اغواء ہونے والی لڑکی کو لاہور سے بازیاب کروا لیا گیا ۔ 17سالہ عروج فاطمہ کو ایبٹ آباد سے نامعلوم افراد نے اغواء کیا اور موٹروے کے ذزریعے لاہور لے کر آئے ۔موٹروے پولیس کی کال پر لاہور پولیس نے لڑکی کی تلاش شروع کردی ۔ تاہم شیراکوٹ کے علاقہ میں لڑکی کار سے بھاگ نکلی ۔گارڈن ٹائون پولیس نے مغوی عروج فاطمہ کو بازیاب کرلیا ۔گارڈن ٹاون پولیس نے مغوی لڑکی کو خیبرپختونخواہ پولیس کے حوالے کردیا ۔