اسلام آباد(این این آئی)وزیر برائے ہوا بازی خواجہ سعد رفیق نے سکھر اور ڈیرہ اسماعیل خان ایئر پورٹ کو انٹرنیشنل ہوائی اڈے کا درجہ دینے کا اعلان کرتے ہوئے کہاہے کہ سب سے زیا دہ آمدن والا ایئرپورٹ لاہور کا ہے، مستقبل کیلئے اسلام آباد ایئرپورٹ بھی بہت سود مند ثابت ہوگاجمعرات کو قومی اسمبلی میں وقفہ سوالات کے دور ان
وزیر ریلوے و ہوا بازی خواجہ سعد رفیق نے اعلان کیا کہ دونوں ایئرپورٹس کی اپ گریڈیشن کیلئے ابتدائی کام مکمل ہوچکا ہے، کراچی ایئر پورٹ کے رن وے کو اپ گریڈیشن کرنے جا رہے، سب سے زیا دہ آمدن والا ایئرپورٹ لاہور کا ہے جبکہ مستقبل کیلئے اسلام آباد ایئرپورٹ بھی بہت سود مند ثابت ہوگا۔انہوں نے کہا کہ ماضی میں سیاسی بنیادوں پر ایئرپورٹ بنائے گئے، سیاسی بنیادوں پر ایئرپورٹ نہیں بننے چاہیں کیونکہ ایسے ایئرپورٹس کی تعمیر سے ریاست کا اربوں روپے خرچ کیا گیا، معذرت کیساتھ ہم سب نے اس میں اپنا حصہ ڈالا۔وفاقی وزیر نے کہا کہ ملک میں 47 میں سے 17 ایئر پورٹس آپریشنل ہیں، ایئر پورٹ ہیں مگر ہمارے پاس جہاز نہیں، قومی ایئر لائن کی فیلڈ پلاننگ ہی غلط کی گئی، پی آئی اے کی فیلڈ پلاننگ کمرشل بنیادوں پر نہیں کی گئی، ہمارے پاس 12 بوئنگ 777 جہاز ہیں دنیا ان سے جان چھڑا رہی ہے۔انہوں نے کہاکہ ہمیں 100 سیٹس والے چھوٹے جہاز چاہیں مگر خریدنے کیلئے پیسے نہیں، کوشش ہے لیز پر جہاز خریدے جائیں، سارا نظام 6 یا 8 ماہ میں ٹھیک نہیں ہوسکتا، پالیسی کا تسلسل رہا تو ریلوے پی آئی اے کوٹریک پر ڈال دیں گے۔خواجہ سعد رفیق نے کہا کہ ریلوے کو اپنے پاؤں پر کھڑا کر کے گیا تھا مگر سابق حکومت کے گزشتہ چار سال میں محکمے کا بیڑہ غرق کردیا گیا۔
