اسلام آباد(این این آئی)توہین عدالت کیس میں چیئرمین پاکستان تحریک انصاف عمران خان کے وکیل نے 25 مئی کے واقعات کی وضاحت کیلئے التوا کی درخواست دائر کر دی۔عمران خان کے وکیل سلمان اکرم راجہ کی جانب سے سپریم کورٹ میں توہین عدالت کیس میں التوا کی درخواست دائر کی گئی۔درخواست میں موقف اختیار کیا گیا کہ میرا موکل افسوسناک واقعہ کی وجہ سے ہسپتال میں داخل ہے، عمران خان کے ہسپتال میں داخل ہونے کی وجہ سے معاملے پر جواب جمع کرانا ممکن نہیں۔عمران خان کے وکیل کی جانب سے استدعا کی گئی ہے کہ مقدمیکو فی الحال سماعت کے لیے مقرر نہ کیا جائے۔یاد رہے کہ گزشتہ سماعت کے موقع پر سپریم کورٹ نے عمران خان سے 25 مئی کے واقعات پر ہفتے تک جواب طلب کرتے ہوئے کہا تھا جو کچھ اس روز ہوا وہ دوبارہ نہیں ہونا چاہیے۔