کویت سٹی(نیوزڈیسک)کویت میں وزارت خارجہ نے ایرانی سفارت خانے کے ناظم الامور کو طلب کیا ہے اور ان سے ایران کی جانب سے ایک بروشر کی اشاعت سے متعلق رپورٹس پر احتجاج کیا ہے۔اس بروشر میں کویت کی بحری حدود میں واقع ایک متنازعہ گیس فیلڈ میں سرمایہ کاری کے مواقع کی تشہیر کی گئی ہے۔کویت کی سرکاری خبررساں ایجنسی نے وزارت خارجہ کے ایک بیان کے حوالے سے بتایا ہے کہ الدرہ آف شور فیلڈ کی حیثیت کے بارے میں کوئی تبدیلی رونما نہیں ہوئی ہے۔یہ گیس فیلڈ کویت ،سعودی عرب اور ایران کے درمیان بحری سرحدی علاقے میں واقع ہے۔یہ آف شور گیس فیلڈ 1960ئ کی دہائی سے ایران اور کویت کے درمیان تنازعے کا سبب بنا ہوا ہے۔ایران نے سنہ 2012ئ میں کہا تھا کہ اس نے اس گیس فیلڈ کے اپنے زیر قبضہ حصے کو ترقی دینے کی منصوبہ بندی کر لی ہے۔یہ حصہ عریش فیلڈ کہلاتا ہے۔وزارت خارجہ نے اتوار کو ایرانی سفارت خانے کے ناظم الامور کو ان رپورٹس کے منظرعام پر آنے کے بعد طلب کیا تھاجن میں کہا گیا تھا کہ ایران کی نیشنل آئیل کمپنی نے ایک پبلیکیشن جاری کی ہے جس میں ایران میں الدرہ فیلڈ کے حصوں سمیت تیل اور گیس کے شعبے میں سرمایہ کاری کے مواقع کی اطلاع دی گئی ہے،بیان کے مطابق وزارت خارجہ علاقائی اور عالمی سطح پر تعلقات اور بین الاقوامی قانون کے مطابق ریاست کویت کے حقوق کے تحفظ کے لیے تمام ضروری اقدامات کررہی ہے۔