نبی کریم ؐکی ذات اقدس پر ہماری جان بھی قربان ہے، پرویز الٰہی
لاہور(آن لائن)وزیراعلیٰ پنجاب چودھری پرویز الٰہی نے اپنے ایک بیان میں کہا ہے کہ سلمان رشدی کے ساتھ جو ہوا،یہ اس کے گستاخانہ فعل کا نتیجہ ہے،
سلمان رشدی نے نبی ؐکی شان اقدس میں جو شر انگیزی کی،وہ ہر مسلمان کے لیے ناقابل برداشت ہے،نبی کریم ؐکی ذات اقدس پر ہماری جان بھی قربان ہے،سلمان رشدی ان منفی قوتوں کا آلہ کار ہے جو مذہب کے نام پر فساد پھیلانے کی سازش کر رہی ہیں،
سلمان رشدی کی ناپاک جسارت نے مسلمانوں کے جذبات کو بری طرح مجروح کیا ہے،وزیراعلیٰ پنجاب نے مزید کہا کہ خاتم النبین حضرت محمدصلیؐکا احترام ہر مسلمان کے ایمان کا لازمی حصہ ہے،
ہر مسلمان کا دل نبی کریم ؐکی محبت سے سرشار ہے،نبی پاک ؐکی شان اقدس کوالفاظ میں بیان کرنا ممکن نہیں،
محسن انسانیت حضرت محمدؐاپنے اعلیٰ کردار اور اسوہ حسنہ کے ذریعے دنیا کیلئے ایک مثال بنے،کسی بھی مہذب معاشرے میں انبیاء کرام کی شان میں گستاخی کا تصور بھی نہیں کیا جاسکتا،
آزادی اظہار کی آڑ میں نبی کریم ؐکی شان میں گستاخی ہر گز برداشت نہیں کی جائے گی۔
