اسلام آباد، راولپنڈی (این این آئی)وزیرداخلہ رانا ثناء اللہ نے سابق وزیر داخلہ شیخ رشید کو ترکی بہ ترکی جواب دیتے ہوئے کہا ہے کہ ملک میں دوجھوٹے ہیں، ایک عمران خان اور دوسرا پنڈی کا شیطان ۔ اپنے بیان میں انہوں نے کہاکہ آئی ایم ایف سے معاہدہ عمران خان نے کیا، اس کی مذمت

کریں جس نے قوم کو اس حالت میں پہنچایا۔ انہوں نے کہاکہ ڈالر کو بے لگام کرنے کا ذمہ دار عمران خان ہے،چپڑاسی بنی گالہ میں سوتے باس کو جگادیتا تو اسے ٹی وی سے ڈالر کی قیمت بڑھنے کا معلوم نہ ہوتا۔ انہوں نے کہاکہ عمران خان کے ارسطو کو پکڑیں جو معیشت کو لفٹ پر اوپر لیجاتے لیجاتے موت کی دہلیز پر لے گیا ۔ رانا ثناء اللہ نے کہاکہ عوام کو مہنگائی میں ڈبونے والا عمران خان ہے ،معیشت کے قاتل آج مظلوم بننے کا ناٹک کررہے ہیں،صرف معیشت ہی نہیں جھوٹ کی سیاست کو بھی ٹھیک کریں گے۔اس سے قبل سابق وزیر داخلہ شیخ رشید نے کہا ہے کہ ڈالر 200 روپے ہوسکتا ہے، جس سے ملک ڈیفالٹ کرسکتا ہے۔سماجی رابطے کی سائٹ ٹوئٹر پر جاری اپنے بیان میں شیخ رشید نے کہا کہ ملک میں دو وزیر اعظم (نواز شریف اور شہباز شریف) ہیں۔شیخ رشید نے کہا کہ دو وزیر خزانہ (مفتاح اسماعیل اور اسحاق ڈار) ہیں۔انہوں نے کہا کہ 2 وزیر پیٹرولیم (خرم دستگیراور شاہد خاقان عباسی) ہیں۔ان کا کہنا تھا کہ زرداری نے کہا کہ جوبائیڈن نے فون پر مراسلے کا حال نہیں بتایا۔سابق وفاقی وزیر کا کہنا تھا کہ ایسی صورتحال میں لانگ مارچ ہی آخری انتہا ہوگی۔خیال رہے کہ گزشتہ روز انٹر بینک میں ڈالر ملکی تاریخ کی بلند ترین سطح 190 روپے پر پہنچ گیا تھا، پاکستان اسٹاک ایکسچینج میں بھی کاروبار کا منفی رجحان رہا تھا۔