لاہور( این این آئی) پاکستان مسلم لیگ (ن) کی نائب صدر مریم نواز نے کہا ہے کہ عمر بھر سازشیں کرنے والا فتنہ عمران خان ملک کی سلامتی کے درپے ہے۔ ٹوئٹر پر اپنے بیان میں انہوں نے کہا کہ یہ شخص نہ صرف آئین کی دھجیاں اڑا رہا ہے بلکہ خانہ جنگی کو ہوا دے رہا ہے۔کیا سیاست دانوں کی پگڑیاں اچھالنے اور ہر آئینی ادارے کو گالی دینے والے شخص کو کھلی چھوٹ ہے کہ افواج پاکستان کو صرف اس لیے تماشہ بنائے کہ وہ آئینی حلف پر قائم ہیں؟۔انہوں نے کہا کہ اپنی نا اہلی سے ملک کو تباہ و برباد کرنے کے بعد اس کی شکایت صرف یہ کہ میرا ساتھ کیوں نہیں دے رہے ؟میرا ساتھ نہیں دو گے تو شرمناک القابات سے پکاروں گا ؟انہوں نے کہا کہ احسان فراموشی کرنے والا یہ محسن کش شخص جس کا نام عمران خان ہے حضرت علی ؓ کے قول کے مطابق اپنے ہی محسنوں کیخلاف اٹھ کھڑا ہوا ہے ۔ مریم نواز نے ایک صارف کو جواب دیا کہ انشاء اللہ 11 مئی کو صوابی میں جلسہ ہو گا۔