اسلام آباد (این این آئی)پاکستان تحریک انصاف کے رہنما علی محمد خان حادثے میں زخمی ہونے والے شہباز گل سے ملاقات کی۔سماجی رابطے کی سائٹ ٹوئٹر پر جاری اپنے بیان میں علی محمد خان نے کہا کہ شہباز گل سے ملاقات ہوئی ہے، ان کی صحت بہتر ہے اور حوصلے پہلے سے زیادہ جوان ہیں۔ ان کا کہنا تھا کہ شیر بچہ ہے، شیر بچہ ڈرنے والا نہیں، شہباز گل کو اللہ نے بچا لیا ورنہ حملہ میں بچنے کی بظاہر تو کوئی وجہ نظر نہیں آتی جس طرح ان کی گاڑی قلابازیاں کھاتے ہوئے تباہ ہوئی مان گئے، بیشک اللہ بچانے والا ہے۔ خیال رہے کہ تحریک انصاف کے رہنما شہباز گل کی گاڑی کو موٹر وے پر حادثہ پیش آیا تھا جس میں وہ زخمی ہو گئے تھے۔ حادثے کے بعد شہباز گل نے کہا تھا کہ ان کی گاڑی کا پیچھا کرکے جان بوجھ کر ایک منصوبے کے تحت ہِٹ کیا گیا تھا۔

موضوعات:علی محمد خان