اسلام آباد(مانیٹرنگ ڈیسک/ این این آئی ) (ن) لیگ کی مرکزی نائب صدر مریم نواز کی جانب سے، پاسپورٹ واپسی درخواست واپس لے لی گئی ہے۔نجی ٹی وی ہم کے مطابق مریم نوازشریف کے وکیل کا کہنا تھا کہ کل کی ٹکٹ تھی، اتنی جلدی پٹیشن پر فیصلہ ممکن نہیں تھا،
موکل کی ہدایت ہر درخواست واپس لے لی ہے۔ مریم نواز نے عمرہ کرنے اور پھر لندن جانے کے لیے پاسپورٹ واپسی کی درخواست کی تھی۔دوسری جانب مسلم لیگ (ن) کی نائب صدر مریم نواز کی جانب سے پاسپورٹ واپسی کے لئے دائر درخواست پر سماعت کرنے والاتیسرا بنچ تحلیل ہونے پر چوتھا بنچ تشکیل دیدیا گیا۔جسٹس علی باقر نجفی کی سربراہی میں لاہور ہائیکورٹ کے دو رکنی بنچ نے مریم نواز کی عمرے پر جانے کیلئے پاسپورٹ واپسی کی درخواست پر سماعت کی۔نیب پراسکیوٹر فیصل بخاری نے مریم نواز کے پاسپورٹ واپسی کی درخواست پر اعتراض کرتے ہوئے کہا کہ مریم نواز کیخلاف سپریم کورٹ میں کیس اور نیب حملہ کیس بھی زیر التوا ہے۔انہوں نے کہا کہ ان مقدمات میں ملوث مریم نواز کے علاوہ تمام ملزمان بیرون ملک فرار ہو چکے ہیں، مریم نواز کی ضمانت منسوخی کیلئے سپریم کورٹ میں اپیل دائر ہے، لہٰذاان کی درخواست مسترد کی جائے۔جسٹس فاروق حیدر نے کیس کی سماعت سے معذرت کرلی جس کے نتیجے میں دو رکنی بنچ تحلیل ہوگیا اور کیس کی فائل چیف جسٹس کو بھجوا دی گئی۔چیف جسٹس نے جسٹس علی باقر نجفی کی سربراہی میں جسٹس اسجد جاوید گھرال پر مشتمل نیا دو رکنی بنچ تشکیل دیدیا جس نے مریم نواز کی درخواست پر سماعت کی تاہم جسٹس اسجد جاوید گھرال نے بھی ذاتی وجوہات کی بنا ء پر سماعت سے معذرت کرلی جس کے نتیجے میں اس درخواست پر تیسرا بنچ بھی تحلیل ہوگیا اور فائل دوبارہ چیف جسٹس کو بھجوا دی گئی۔چیف جسٹس لاہور ہائیکورٹ نے مریم نواز کی درخواست پر سماعت کے لئے جسٹس علی باقرنجفی کی سربراہی میں جسٹس سردار احمد نعیم کی سربراہی میں نیا بنچ تشکیل دیدیا جو آج بدھ کے روز سماعت کر ے گا۔
