ریاض(این این آئی )سعودی وزارت حج و عمرہ نے 10 عمرہ کمپنیوں کے خلاف سزا کا اعلان کیا ہے۔ میڈیارپورٹس کے مطابق ان میں ہر کمپنی کو 50 ہزار ریال تک جرمانہ ادا کرنا ہو گا۔ اس سزا کی وجہ مذکورہ کمپنیوں کی

جانب سے معتمرین کو پیش کی جانے والی خدمات میں غفلت اور بے ضابطگی ہے۔ ان میں اہم ترین خلاف ورزیاں رہائش اور ٹرانسپورٹ سے متعلق ہیں۔میڈیارپورٹس کے مطابق وزارت حج و عمرہ نے باور کرایا کہ وہ اللہ کے مہمانوں کو پیش کی جانے والی خدمات میں کسی قسم کی غفلت یا کوتاہی کی اجازت ہر گز نہیں دے گی۔ اس مقصد کے لیے کڑی نگرانی کے واسطے دورے اور معتمرین کی جانب سے دی جانے والی اطلاعات کے ساتھ تعامل بنیادی عوامل ہیں۔ ان امور کا مقصد اللہ کے مہمانوں کو پیش کی جانے والی خدمات کا معیار بلند کرنا اور ان کی سلامتی کو یقینی بنانا ہے۔ وزارت حج و عمرہ نے مملکت کے اندرون و بیرون موجود عمرہ کی ادائیگی کے خواہش مند تمام افراد پر زور دیا کہ وہ صرف اجازت یافتہ اداروں کے ساتھ معاملات انجام دیں۔