کراچی (آئی این پی)کراچی میں خواتین کو بلیک میل کرکے نازیبا ویڈیو بنانے والے گروہ کا انکشاف ہوا ہے۔نجی ٹی وی کو متاثرہ خاتون کا بیان موصول ہوا ہے جس میں خاتون نے بتایا کہ گینگ کے کارندے خود کو انٹیلی جنس اہلکار ظاہر کرتے ہیں، زین نامی شخص نے واٹس ایپ پر
رابطہ کرکے کہا آپ کی اور آپ کی بیٹی کی نازیبا وڈیو ہمارے پاس ہے۔متاثرہ خاتون شگفتہ نے کہا کہ ملزمان نے کہا کہ ہم نے آپ کے گھر میں کیمرے لگائے ہیں، انٹیلیجینس میں ہوتا ہوں ، تمہارا رشتے دار حیدر ہمارا افسر ہے، تنگ کررہا ہے اس کو روکو نہیں تو اچھا نہیں ہوگا۔خاتون نے کہا کہ حیدر کو بتایا تو اس نے کہا زین کو مارکر پھینک دیا ہے اب تنگ نہیں کرے گا، اسی نمبر سے پھر قمر اور رئیس نامی اشخاص نے تنگ کرنا شروع کردیا، میرے شوہر کے قتل کی دھمکیاں دیکر میری اور میری 15 سالہ بیٹی کی نازیبا وڈیو بنوائی۔خاتون نے کہا کہ مجھے اور میری بیٹی کی عزت خراب کرنے میں حیدر، کاشف، رئیس، قمر اور زین ملوث ہیں، مجھے غلط کاموں کے لئے مجبور کیا جارہا ہے۔متاثرہ خاتون نے کہا کہ نہ ماننے کی صورت میں پانچ لاکھ روپے طلب کیے جارہے ہیں، ورنہ میرے شوہر کو قتل اور ویڈیو وائرل کردیں گے، میں اعلیٰ پولیس افسران سے مدد کی اپیل کرتی ہوں۔
