کیرالہ (آئی ا ین پی ) بھارتی ریاست کیرالہ میں سفاک باپ نے اپنے بیٹے ، بہو اور دو پوتیوں کو گھر میں آگ لگا کر زندہ جلادیا۔بھارتی میڈیا رپورٹس کے مطابق ریاست کیرالہ کے علاقے اڈوکی میں 79 سالہ حامد کا اپنے بیٹے 50 سالہ محمد فیضل سے جائیداد کے معاملے پر تنازع چل رہا تھا۔

حامد کئی بار اپنے ہی بیٹے کو اسے جلا کر مار دینے کی دھمکیاں دے چکا تھا۔ فیضل نے اس سلسلے میں پولیس کو درخواست بھی دی تھی لیکن پولیس نے دونوں فریقین کے درمیان تصفیہ کرادیا تھا۔ معاملہ پولیس میں جانے کے باوجود حامد نے اپنے بیٹے اور اس کے پورے خاندان کو ہلاک کرنے کا تہیہ کررکھا تھا۔ اپنے ارادے کو پایہ تکمیل تک پہچانے کے لیے حامد نے فیضل اور اس کے بیوی بچوں کے سونے کا انتظار کیا۔ حامد نے گھر کو باہر سے بند کیا اور پیٹرول کی بوتلیں کھڑکی سے اندر پھینک کر آگ لگادی۔ گھر میں سوئے تمام لوگوں کو مارنے کے لیے حامد نے پانی کی سپلائی روکنے کے لیے موٹر کی بجلی کا کنکشن بھی کاٹ ڈالا۔ آگ لگنے سے 50 سالہ فیضل، اس کی 45 سالہ بیوی شیبا ، بیٹی 17 سالہ مہرین اور 12 سالہ اثنا جل کر ہلاک ہوگئے۔ پولیس نے لاشوں کو پوسٹ مارٹم کے بعد لاشوں کو ورثا کے حوالے کردیا جب کہ موقع پر سے ہی حامد کو گرفتار کرلیا ہے۔