اسلام آباد (این این آئی)پاکستان مسلم لیگ ن نے وزیر اعظم عمران خان کے خلاف الیکشن کمیشن میں جانے کا فیصلہ کیا ہے۔قومی اسمبلی میں قائد حزب اختلاف اور پاکستان مسلم لیگ ن کے صدر شہباز شریف کی زیر صدارت پارٹی رہنماؤں کا اسلام آباد میں اجلاس ہوا۔ذرائع کا کہنا ہے کہ
اجلاس میں وزیراعظم کی آج کی تقریر کے مندرجات کا جائزہ لیا گیا۔ذرائع کا کہنا ہے کہ ن لیگ نے وزیر اعظم کے لوئر دیر میں ہونے والے جلسے پر الیکشن کمیشن سے رجوع کرنے کا فیصلہ کیا ہے، قانونی ٹیم سے مشاورت کے بعد الیکشن کمیشن میں ضابطہ اخلاق کی خلاف ورزی پر درخواست دی جائے گی۔ذرائع کا کہنا ہے کہ اجلاس میں موجودہ سیاسی صورتحال اور حکومتی اتحادیوں سے روابط پر بھی غور کیا گیا۔ذرائع کے مطابق شہباز شریف نے پارٹی رہنماؤں سے مشاورت کے بعد اتحادیوں سے ملاقاتیں کرنے پر غور شروع کردیا، جبکہ مسلم لیگ ق کے رہنماؤں سے ملاقات پر فیصلہ بھی پارٹی رہنماؤں کی مشاورت سے کرنے پر اتفاق کیا گیا۔
