کراچی(این این آئی)متحدہ عرب امارات جانے والے 36مسافر کورونا زدہ نکلے، مذکورہ مسافروں کی روانگی منسوخ کرکے ان کو فوری طور پر قرنطینہ مرکز پہنچا دیا گیا۔تفصیلات کے مطابق ملک کے مختلف ایئر پورٹس پر کورونا وائرس کی روک تھام کیلئے اقدامات کا سلسلہ جاری
ہے اس سلسلے میں ملک میں آنے اور جانے والوں کے طبی معائنے اور ٹیسٹ کیے جارہے ہیں۔ذرائع نے بتایاکہ کراچی سے دبئی جانے والے 36مسافروں میں کورونا وائرس کی تصدیق ہونے کے بعد انہیں سفر کرنے سے روک دیا گیاہے۔مسافر مختلف پروازوں کے ذریعے متحدہ عرب امارات جانا چاہتے تھے۔ ذرائع کے مطابق ریپیڈ انٹیجن ٹیسٹ کے ذریعے ان مسافروں کی کورونا وائرس کی تشخیص ہوئی ہے۔کراچی جناح ایئرپورٹ پرمتحدہ عرب امارات جانے والے مسافروں کو پرواز کی روانگی سے4گھنٹے قبل ریپڈ انٹیجن ٹیسٹ کئے گئے تھے۔چوبیس گھنٹوں کے دوران مسافروں کے ریپڈ ٹیسٹ کئے گئے تو ان میں مجموعی طور 36مسافروں میں کورونا وائرس کی تشخیص ہوئی۔اس حوالے سے سول ایوی ایشن ذرائع نے بتایاکہ مذکورہ تمام مسافروں کو سفر کی اجازت نہیں دی گئی، مثبت آنے والے مسافر قرنطینہ کیلئے مختلف اسپتالوں میں منتقل کردیئے گئے ہیں۔ذرائع نے بتایاکہ وزیراعلی اور وزیر صحت سندھ نے کراچی ایئرپورٹ پر مانیٹرنگ مزید سخت کرنے کا حکم دیا ہے۔خیال رہے پاکستان میں کورونا کے پھیلائو میں شدت آگئی ہے اور کراچی میں کورونا کی شرح 11فیصد سے تجاوز کر گئی ہے، ایک دن میں ایک ہزار سے زائد کیسز رپورٹ ہوئے۔
