اسلام آباد (مانیٹرنگ ڈیسک /این این آئی ) الیکشن کمیشن نے این اے 133لاہور کے ضمنی انتخابات میں ووٹوں کی مبینہ خریداری سے متعلق تحقیقات کا دائرہ مزید وسیع کردیا۔تفصیلات کے مطابق ووٹ خریدنے کی مبینہ ویڈیو کی رپورٹ کل جمع کروائی جائے گی۔ نجی ٹی وی ہم نیوز کے مطابق الیکشن کمیشن نے ووٹوں کی خریداری سچ ثابت ہونے پر انتخابات ملتوی کرنے کا عندیہ بھی دے دیا۔

ترجمان الیکشن کمیشن کا کہنا ہے کہ الزامات ثابت ہونے پر این اے 133 کا ضمنی انتخاب ملتوی بھی ہو سکتا ہے۔ اگر معاملہ زیر التوا رہا اور الیکشن کے بعد ثابت ہوا تو امیدوار کو نااہل قرار دیا جا جاسکتا ہے۔واضح رہے کہ الیکشن کمیشن نے این اے 133 لاہور ضمنی انتخاب میں پیسوں سے ووٹ خریدنے کے معاملے پر ویڈیو کا نوٹس لے لیا ہے ، ریٹرننگ افسر نے نادرا، پیمرا، پولیس اور کمشنر لاہور سے 30 نومبر کو رپورٹ مانگ لی۔ میڈیا رپورٹ کے مطابق ریٹرننگ افسر این اے 133 نے کمشنر لاہور اور آئی جی پنجاب سمیت چیرمین نادرا اور پیمرا کو نوٹس جاری کردیا ہے۔ریٹرننگ افسر نے ویڈیو میں نظر آنے والے لوگوں کی شناخت کے لیے مدد مانگ لی۔نوٹس میں کہا گیا کہ فوٹیج کا فارنزک کروایا جائے، افراد اور عمارت کی شناخت کی جائے، آئی جی پولیس ملوث شخص کو گرفتار کریں، چئیرمین پیمرا فوٹیج کا فرانزک کرائیں کہ آیا فوٹیج اصل ہے اور اس میں موجود افراد کی شناخت کریں، ملوث افراد کا مکمل بائیو ڈیٹا فراہم کیا جائے۔ریٹرننگ افسر نے نادرا، پیمرا، پولیس اور کمشنر لاہور سے 30 نومبر کو رپورٹ مانگ لی۔خیال  رہے کہ صوبائی دارالحکومت لاہور کے حلقہ این اے 133کے ضمنی انتخاب کیلئے ووٹوں کی خریدو فروخت کی مبینہ ویڈیو منظر عام پر آگئی جس پر تحریک انصاف نے الیکشن کمیشن سے نوٹس لینے کا مطالبہ کردیا۔سوشل میڈیا پر وائرل ہونے والی مبینہ ویڈیو میں دیکھاجا سکتا ہے دو افرادانتخابی مہم کیلئے قائم کئے گئے دفتر میں موجود ہیں جہاں پر مسلم لیگ (ن) کی امیدوارشائستہ پرویز ملک کی فلیکسز اوربینرزبھی آویزاں نظر آرہے ہیں۔انتخابی دفترمیں موجود مردو خواتین باری باری آتے ہیں جہاں پر ایک شخص میز پر رکھے قرآن پاک پر ہاتھ رکھوا کران سے حلف لیتاہے کہ میں قرآن پاک پر ہاتھ رکھ کرحلف دیتا/دیتی ہوں کہ پانچ تاریخ کو مسلم لیگ (ن) /شیرکوووٹ دوں گا/دوں گی

۔اس کے بعد وہ شخص وہاں آنے والوں سے شناختی کارڈ لیتا ہے اور ساتھ موجود شخص فہرست میں اندراج کرنے کے بعد نقدی کی صورت میں پیسے دیتا ہے۔مبینہ ویڈیو میں کئی خواتین نظر آرہی ہیں جوحلف دینے اور پیسے لینے کی منتظر ہیں۔ ایک دوسری مبینہ ویڈیو میں ایک شخص سے معلومات لی جارہی ہیں اور دونوں کے چہرے نظر نہیں آرہے۔ معلومات لینے والے شخص کو دوسرا شخص بتا رہا ہے کہ

عورتوں کو حلف اورشناختی کارڈ کااندراج کرانے کے عوض چار ہزارروپے جبکہمردوں کو پانچ ہزار روپے دئیے جارہے ہیں۔ اس شخص نے بتایاکہ ہم پانچ افراد آئے اور حلف دے کر پچیس ہزار روپے وصول کئے ہیں اورمیں اور بھی لوگوں کو لینے جارہا ہوں۔دوسری مبینہ ویڈیو میں اطراف میں بھی مسلم لیگ(ن) کے قائد نواز شریف اور لیگی امیدوار شائستہ پرویز ملک کے بینرز اورفلیکسز نظر آرہے ہیں

۔مبینہ ویڈیوسامنے آنے پر وزیر مملکت برائے اطلاعات و نشریات فرخ حبیب نے ووٹوں کی خریدوفروخت پر الیکشن کمیشن سے نوٹس لینے کا مطالبہ کرتے ہوئے کہا ہے کہ ویڈیوز بڑا ثبوت ہیں،پیسے کا لالچ دے کر ووٹ خریدے جارہے ہیں جو کہ الیکشن قوانین کی کھلم کھلا خلاف ورزی ہے۔انہوں نے کہاکہ انتخابی قوانین کے مطابق کسی کے ضمیرکو نہیں خریداجاسکتا، ویڈیوز سے ثابت ہورہاہے

کہ باقاعدہ ضمیرخریدے جارہے ہیں، الیکشن کمیشن کواس سے بڑا کیاثبوت چاہیے؟ اس کا فوری نوٹس لینا چاہیے۔کاغذات نامزدگی مسترد ہونے پر انتخابی عمل سے باہر ہونے والے تحریک انصاف کے امیدوار جمشید اقبال چیمہ نے کہا ہے کہ الیکشن کمیشن کو اب اپنی رٹ دکھاناہوگی وگرنہ اسکی ساکھ پر سوال اٹھتا رہے گا۔ انہوں نے کہا کہ ویڈیوز میں واضح دیکھا جا سکتاہے کہ کس طرح مسلم لیگ(ن) والے

غریب ووٹروں کی بے بسی کو خرید رہے ہیں۔ وزیر اعظم عمران خان اسی نظام کو دفن کرنے کے لئے انتخابی اصلاحات کی بات کرتے ہیں لیکن متوالے اورجیالے اس میں رکاوٹ بنتے آرہے ہیں۔ انہوں نے کہا کہالیکشن کمیشن سے مطالبہ ہے کہ ان ویڈیوز پر فی الفورنوٹس لیا جائے اور لیگی امیدوارکو نا اہل قرار دے کر اس حلقے میں انتخابی عمل کودوبارہ شروع کیا جائے اور اس کے ساتھ ساتھ انتخابی فہرستوں میں وسیع پیمانے پر پائی جانے والے بے ضابطگیوں کودور کیا جائے تاکہ شفاف انتخاب کاعمل یقینی بنایا جا سکے۔