کراچی(این این آئی)پاکستان پیپلز پارٹی پارلیمنٹرینزکی مرکزی سیکرٹری اطلاعات و رکن قومی اسمبلی شازیہ عطاء مری نے کہا ہے کہ وفاقی حکومت نے ملک میں مہنگی چینی

کی درآمدگی کرکے قومی خزانے کو لوٹنے کی بڑی واردات کی ہے،فی کلوچینی123روپے در آمد کرنے کا فیصلہ قومی خزانہ پر ڈاکا نہیں تو اور کیا ہے ۔پیرکو جاری اپنے بیان میں شازیہ مری نے وزیراعظم سے سوال پوچھتے ہوئے کہا کہ وزیراعظم صاحب ملک میں لوٹ مار کرے رے ہو یا کرامات کر رہے ہو۔مرکزی سیکرٹری اطلاعات پی پی پی پی نے کہا کہ حکومت نے فیصلہ کیا ہے کہ یوٹیلیٹی اسٹورز کو 85 روپے کلو چینی بیچی جائے گی تو پھر 38 روپے کس کی جیب میں جائیں گے اور اوپن مارکیٹ میں کوئی اتنی مہنگی چینی نہیں خریدے گا۔شازیہ مری نے کہا کہ عمران خان اپنے مالی سہولت کاروں کو امیر سے امیر ترین بنا رہا ہے اس نے معیشت سے وابستہ ہر وزارت اور محکمہ میں مالی سہولت کار بٹھا رکھے ہیں۔ شازیہ مری نے سوال کرتے ہوئے کہا کہ کیا ملک کی تمام شوگر ملز بند ہو چکی ہیں، چوپٹ راجا نے ملک کو اندھیری نگری بنا دیا ہے ۔