کراچی(این این آئی) ہیکرز کی جانب سے مشیر جیل خانہ جات اعجاز جکھرانی کی سوشل میڈیا آئی ڈی ہیک کرلی گئی ہے۔ذرائع کے مطابق وفاقی تحقیقاتی ادارے ایف آئی اے سائبر کرائم ونگ کو پاکستان پیپلز پارٹی کے رہنمااور وزیراعلیٰ سندھ کے مشیر برائے جیل خانہ جات اعجاز جکھرانی کی جانب سے آئی ڈی ہیک ہونے کی درخواست موصول ہوئی ہے،جس میں انہوں نے کہا کہ میری آئی ڈی انہوں نے
ہیک کرائی جو مجھے عدالتوں میں گھسیٹ رہے ہیں۔اعجاز جکھرانی نے کہا کہ میری آئی ڈی ہیک کرکے غلط ویڈیو شیئر کی جارہی ہیں۔ایف آئی اے سائبر کرائم کو اس سے قبل بھی متعدد شہریوں کی جانب سے آئی ڈیز ہیک ہونے کی شکایات موصول ہوچکی ہیں، ہیکرز کی جانب سے شہریوں کی آئی ڈی ہیک کرکے نامناسب مواد شیئر کیا جاتا ہے جو مہذب صارفین کیلئے رسوائی کا باعث ہوتا ہے۔
