لاہور( این این آئی)صوبائی وزیرتوانائی ڈاکٹر اختر ملک کے نام پر جعلی فیس بک اکائونٹ بنا کر پیسوں کامطالبہ کئے جانے کا انکشاف ہوا ہے،صوبائی وزیر اختر ملک نے جعلسازوں کے خلاف ایف آئی اے

سائبر کرائم ونگ سے رجوع کرنے کا اعلان کر دیا ۔ وزیر توانائی ڈاکٹراخترملک کی جانب سے جاری بیان میں کہا گیا ہے کہ میرے نام سے فیس بک پر جعلی اکائونٹ بنا کر لوگوں سے پیسوں کا مطالبہ کیا جا رہا تھا۔ تمام دوست احباب کومتنبہ کرتا ہوں کہ وہ میرے نام سے رقم دینے کے جھانسے میں نہ آئیں۔اس معاملہ ایف آئی اے سائبر کرائم ونگ سے رجوع کر رہا ہوں۔ ڈاکٹر اختر ملک کے مطابق میں نے جعلی فیس بک کا اکائونٹ اپنے تصدیق شدہ سوشل میڈیا ہینڈلز پر شیئر کر دیا ہے۔میرے نام پر جس نمبر سے رقم کا مطالبہ کیا جا رہا تھا وہ بھی شیئر کر چکا ہوں، میری درخواست ہے کہ میرے دوست احباب جعلسازوں سے ہوشیار رہیں۔