اسلام آباد (این این آئی)آڈٹ حکام نے پبلک اکائونٹس کمیٹی کے اجلاس میں بتایا ہے کہ افغان پناہ گزینوں کو شہریت کارڈز جاری نہ کیئے جانے کے باعث 12 کروڑ 70 لاکھ روپے کا نقصان ہوا ہے۔پبلک اکائونٹس کمیٹی کا اجلاس منعقد ہوا جس میں افغان پناہ گزینوں کیلئے شہریت کارڈ جاری
کرنے کا معاملہ زیرِ غور آیا۔آڈٹ حکام نے اجلاس کو بتایا کہ منصوبے کے تحت افغان پناہ گزینوں کو 10 لاکھ کارڈز جاری کیئے جانے تھے، 6 لاکھ کارڈ پرنٹ ہوئے جبکہ 3 لاکھ کارڈز جاری کیئے گئے۔آڈٹ حکام نے بتایا کہ افغان پناہ گزینوں کو 2 لاکھ 96 ہزار کارڈز جاری نہیں کیئے جا سکے، کارڈز جاری نہ کرنے سے 12 کروڑ 70 لاکھ روپے کا نقصان ہوا۔نادرا حکام نے اجلاس کو بتایا کہ افغانوں کی بہت سی تعداد ایسی ہے جو نادرا سے رجسٹرڈ نہیں ہونا چاہتی۔نادرا حکام کے مطابق 45 ہزار کارڈز کا پراسس مکمل ہے، افغان شہری وہ کارڈ لینے نہیں آئے۔چیئرمین پبلک اکائونٹس کمیٹی (پی اے سی) نے بتایاکہ غیر متوقع حالات کے باعث یہ نقصان ہوا۔پبلک اکائونٹس کمیٹی نے نادرا کا افغان پناہ گزینوں کو شہریت کارڈ دینے کے حوالے سے آڈٹ پیرا نمٹا دیا۔
