دوشنبے (این این آئی)تاجکستان کی وزارت خارجہ نے کہاہے کہ افغانستان سے فرار ہوجانے والے صدر اشرف غنی کا طیارہ تاجکستان نہیں آیا ہے۔غیرملکی خبررساں ادارے کے مطابق تاجک وزارت خارجہ کی جانب سے جاری ایک بیان میں کہا گیا ہے کہ دوشنبے کو اشرف غنی کے معاملے پر کوئی درخواست نہیں ملی۔وزارت خارجہ نے مزید بتایا کہ اشرف غنی کا طیارہ نہ تاجک فضائی حدود میں آیا نہ تاجکستان میں اترا ہے۔واضح رہے کہ گزشتہ روز افغان صدر اشرف غنی نے سوشل میڈیا پر ایک بیان جاری کیا تھا جس میں ان کا کہنا تھا کہ خونریزی سے بچنے کیلئے افغانستان چھوڑ ا ہے۔گزشتہ روز طالبان نے افغانستان کے دارالحکومت کا کنٹرول بھی سنبھال لیا، اتوار کی صبح طالبان بغیر مزاحمت ہی کابل اور جلال آباد میں داخل ہوگئے۔