چکوال(این این آئی)فراڈیئے سستی چینی کا جھانسہ دیکر لوگوں کو نمک کی بوریاں تھما کر لاکھوں روپے بٹور کر چلتے بنے۔خان پور میں فراڈیئے بظاہر چینی سے لدی ہوئی ایک شہ زور پر آئے اور 4200 فی بیگ کی صدائیں لگائیں جس پر دکانداروں اور دیگر افراد کی ایک بڑی تعداد اکھٹی ہوگئی۔فراڈیئے لوگوں کو
ایک کھلے ہوئے بیگ سے چینی کی کوالٹی چیک کراتے رہے۔دکانداروں اور لوگوں نے اس وقت اپنے سر پکڑ لئے جب چینی کی بوریاں کھولنے پر ان سے چینی کی طرح پسا ہوا نمک نکل آیا۔فراڈیے اپنی واردات ڈال کر چلتے بنے۔لوگوں کو ابھی تک ان کے بارے میں کوئی سراغ نہیں مل سکا۔
