کوئٹہ (مانیٹرنگ+ آن لائن) تحریک انصاف کی جانب سے عبدالقادر کو سینٹ کا ٹکٹ دیے جانے پر بلوچستان کے عہدیداروں نے اپنے تحفظات کا اظہار کیا ہے، نجی ٹی وی چینل کی رپورٹ کے مطابق کوئٹہ ریجن کے عہدیداروں نے عبدالقادر نامی شخص کا نام مسترد کردیا ہے۔دعوی کیا گیا ہے کہ تحریک انصاف شمال مشرقی ریجن نے

فیصلے کے خلاف اجلاس بھی بلا لیا ہے جس میں متبادل امیدوار کے نام پر غور کیا جائے گا۔ تحریک انصاف کے عہدیداروں نے عبدالقادر کو پیراشوٹر قرار دیا ہے اور کہا ہے کہ اس کا پارٹی سے کوئی تعلق نہیں ہے۔ تحریک انصاف کے رہنماؤں کا کہنا ہے کہ عبدالقادر اسلام آباد کی کاروباری شخصیت اور کنسٹرکشن کمپنی کے مالک ہیں،انہوں نے کہا کہ صوبے میں سنجیدہ اور سینئر لوگ موجود ہیں تو پھرصوبائی پارلیمانی لیڈر کی مشاورت کے بغیر ان کا نام کیسے فائنل کردیا گیا، بلوچستان پی ٹی آئی رہنماؤں نے کہا ہے کہ وزیر اعظم تو سینیٹ میں رقم استعمال کرنے کے خلاف ہیں تو پھر ایک پیرا شوٹر کو ٹکٹ کیوں دیا؟ دوسری جانب خبر رساں ادارے آن لائن کا کہنا ہے کہ سینیٹ انتخابات میں پاکستان تحریک انصاف میں اختلافات پیدا ہوگئے ،پی ٹی آئی مرکز نے بلوچستان سے عبدالقادر کونامزد کردیاہے تاہم پی ٹی آئی بلوچستان کے پارلیمانی لیڈر کے ترجمان نے کہاہے کہ عبدالقادر کا پارٹی سے کوئی تعلق نہیں ہے۔تفصیلات کے مطابق پاکستان تحریک انصاف کے چیئرمین عمران خان کی ہدایت پر پارلیمانی بورڈ کی جانب سے دیگر صوبوں کی طرح بلوچستان سے بھی سینیٹ انتخابات کیلئے امیدوار عبدالقادر کے نام کااعلان کردیاہے وفاقی وزیر فواد چوہدری نے تصدیق کرتے ہوئے کہاکہ عبدالقادر پی ٹی آئی بلوچستان کی

طرف سے سینیٹ انتخابات کے امیدوار ہوں گے جبکہ دوسری جانب پی ٹی آئی بلوچستان کے پارلیمانی لیڈر سرداریارمحمد رند کے ترجمان بابر یوسف زئی کے مطابق عبدالقادر کا پی ٹی آئی سے کوئی تعلق نہیں ہے اور نہ ہی عبدالقادر کانام فائنل کرنے کیلئے پارلیمانی لیڈر سے مشاورت کی گئی ہے عبدالقادر ایک سرمایہ دار اور

کنسٹرکشن کمپنی کا مالک ہے انہوں نے دعویٰ کیاکہ عبدالقادر پر نیب کے کیسز بھی ہیں چونکہ عبدالقادر نے ہر ٹھیکے میں شہبازشریف اور نوازشریف کے ساتھ مل کر غبن کیاتھا۔واضح رہے کہ پی ٹی آئی میں 16فروری کو حلقہ پی بی 20پشین تھری پر ضمنی انتخابات میں بھی اختلافات ہیں،صوبائی قیادت کی جانب سے بلوچستان عوامی پارٹی کی حمایت کااعلان کیاگیاہے جبکہ ضلع کی جانب سے اپنا امیدوار سامنے لا یا گیاہے۔