اسلام آباد(مانیٹرنگ ڈیسک،این این آئی )صوبہ پنجاب کے سکولوں میں موسم سرما کی تعطیلات وقت سے قبل دئیے جانے کی تیاریاں۔ میڈیا رپورٹس کے مطابق پنجاب میں سموگ اور کورونا وائرس پھیلائو کے خدشے کے پیش نظر قبل از وقت موم سرما تعطیلات دیے جانے کا امکان ہے۔
اس حوالے سے صوبائی حکام اور وفاقی حکومت کے درمیان مشاورت جاری ہے۔ ممکنہ طور پر پنجاب میں نومبر کے وسط سے موسم سرما کی تعطیلات دے دی جائیں گی۔جو 2 ہفتے پر محیط ہوسکتی ہیں۔اعلان جلد متوقع ہے ، دوسری جانب وفاق میں بھی نومبر کے دوسرے ہفتے سے چھٹیاں دینے کی تجویز زیر غور ہے۔سکول، کالجز ، یونیورسٹیز نومبر کے دوسرے ہفتے سے بند کرنے پر مشاورت جاری ہے، یاد رہے کرونا لاک ڈائون کے بعد تعلیمی ادارے کھولنے پر اعلان کیا گیا تھا کہ کئی ماہ کی بندش اور بچوں کے تعلیمی نقصان کی وجہ سے رواں سال موسم سرما کی تعطیلات نہیں دی جائیں گی۔دریں اثناوفاقی حکومت نے اہم فیصلوں کے لئے بین الصوبائی وزرائے تعلیم کااجلاس کل طلب کرلیا ۔ اجلاس کی صدارت وفاقی وزیر تعلیم شفقت محمود کریں گے جبکہ صوبائی وزرائے اور اعلی حکام بذریعہ ویڈیو لنک اجلاس میں شریک ہوںگے۔ بتایا گیا ہے کہ اجلاس میں کورونا وائرس کی صورتحال ، موسم سرما کی چھٹیاں اور آٹھویں بورڈ کا امتحان لینے یا
نہ لینے جبکہ تعلیمی سال کو یکم اپریل کی بجائے یکم اگست تک بڑھانے کے فیصلوں پر غور اور بعد ازاںحتمی اعلان کیاجائے گا۔دریں اثناوزیر اعظم کے معاون خصوصی برائے صحت ڈاکٹرفیصل سلطان نے کہا ہے کہ کورونا کو لے کر ابھی ہم اس مرحلے پر ہیں جہاں بروقت فیصلے
نہ کیے گئے تو صورت حال خطرناک حد تک پہنچ سکتی ہے۔اپنے بیان میں پاکستان میں کورونا وائرس کے کیسز کی بڑھتی ہوئی شرح کے حوالے سے معاون خصوصی برائے صحت ڈاکٹر فیصل سلطان نے کہا کہ ایس او پیز پر عمل درآمد میں زیادہ سختی کی ضرورت ہے۔
