اسلام آباد (آن لائن)مریم نواز کی اسلام آباد ہائی کورٹ میں پیشی کے موقع پر سکیورٹی اہلکاروں کی بدتمیزی ،ہائیکورٹ کے باہر سے نجی چینل سے تعلق رکھنے والے صحافی احتشام کیانی کو گرفتار کر لیا گیا۔
چیف جسٹس اسلام آباد ہائی کورٹ کے نوٹس لینے پر پولیس نے رہا کر دیا۔ تفصیلات کے مطابق صحافی مریم نواز کیس کی کوریج کے لیے ہائی کورٹ آیا تھا جسے تلخ کلامی پر اسلام آباد پولیس نے گرفتار کر کے تھانے رمنا منتقل کر دیا۔چیف جسٹس ہائیکورٹ جسٹس اطہر من اللہ نے پولیس کے اعلیٰ حکام کو فوری طلب کیا اور معاملہ پر شدید غم و غصے کا اظہار کیا ۔ہائیکورٹ جرنلسٹ ایسوسی ایشن کے نمائندے چیف جسٹس کی عدالت میں پیش ہوئے اور شدید احتجاج کیا۔ پولیس نے گرفتار کر کے کہا صحافی کو چف جسٹس کے کہنے پر گرفتار کیا گیا جس پر چیف جسٹس اطہر من اللہ نے پولیس حکام پر برہمی کا اظہار کرتے ہوئے کہا کہ میری طرف سے صحافیوں کو گرفتار کرنے کا کوئی حکم نہیں دیا گیا۔ ازاں بعد چیف جسٹس کی مداخلت پر صحافی کو رہا کر دیا گیا۔
