کراچی (این این آئی)پاکستان کرکٹ ٹیم کے سابق کپتان سرفراز احمد نے مانچسٹر میں انگلینڈ کے خلاف آخری ٹی ٹوئنٹی میچ کھیلنے سے انکار کردیا تھا۔ذرائع کے مطابق سرفراز احمد ، یونس خان کے سمجھانے اور مصباح الحق کی یقین دہانی پر میچ کھیلنے پر رضامند ہوئے۔ چیف سلیکٹر

اور ہیڈ کوچ مصباح الحق نے نجی ٹی وی گفتگو کرتے ہوئے کہا کہ سرفراز احمد نے انکار نہیں کیا تھا ان کے تحفظات تھے، اگر وہ بھی سرفراز احمد کی جگہ ہوتے تو یہی کرتے۔انہوں نے بتایا کہ سرفراز احمد کے خدشات دور کرنے کی ضرورت تھی، جو ہم نے دور کردیے اور معاملہ ختم ہوگیا۔انہوں نے تصدیق کی کہ سرفراز احمد، ان کے، بابر اعظم اور یونس خان کے سمجھانے پر میچ کھیلنے کے لیے رضامند ہوئے تھے۔مصباح نے کہا  سرفراز احمد نے انکار نہیں کیا تھا تاہم جب آپ کو سیریز کا آخری میچ کھلایا جائے تو کھلاڑی کو یقینی طور پر تشویش لاحق ہوتی ہے، تشویش کی وجہ سے سرفراز احمد نے اپنے تحفظات کا ٹیم انتظامیہ سے اظہار کیا تھا۔چیف سلیکٹر کے مطابق سیریز کا آخری میچ تھا اس لیے ان پر دبا تھا کہ اگر انیس بیس ہوگیا تو وہ مشکل میں آسکتے ہیں۔