پیرس(نیوزڈیسک )بڑے پیمانے پر مختلف ایونٹس کا انعقاد جہاں صحتمند معاشرے کی عکاسی کرتا ہے، وہیں شرکا کے لیے ذہنی پریشانیاں دور کرنے کا سبب بھی بنتا ہے۔ فرانس میں سالانہ کیچڑ اور رکاوٹوں کو عبور کرنے کی سخت ترین ریس ٹف مڈر کا انعقاد کیا گیا۔ گذشتہ دنوں ہونے والی اس ریس میں سینکڑوں مردوں خواتین نے ٹیموں کی شکل میں حصہ لیا اور شدید اور مشکل رکاوٹوں سے بھرا 8میل کا فاصلہ طے کیا۔ ریس میں حصہ لینے والے تقریبا 8ہزار سے زائد شرکا کو جہاں کیچڑ اور تالابوں سے گزرنا تھا، وہیں کیچڑ سے بھرے گڑھے، برفیلے پانی سے بھری تاریک سرنگیں اور ان میں نصب خار دار تاروں نے شرکا کی سختیاں اور بڑھا دیں۔ ریس کے بعد ہر سال کی طرح اس سال بھی کئی لوگ مختلف بیماریوں کا شکار ہوئے، لیکن اگلے برس پھر اس کا حصہ بننے کا عزم ظاہر کیا۔