لاہور(این این آئی)پاکستان مسلم لیگ (ن) کے صدر و قائد حزب اختلاف محمد شہبازشریف نے کورونا وائرس کے مریضوں کی تعداد میں اضافے پر تشویش کا اظہار کرتے ہوئے کہا ہے کہ درپیش صورتحال سے موثر انداز میں نمٹنے اورعوام کی حفاظت یقینی بنانے کے لئے قومی حکمت عملی بنائی جائے۔
اپنے بیان میں انہوں نے کہا کہ وزیراعظم فوری اعلی سطحی اجلاس بلائیں جس میں چاروں وزرائے اعلی، وزیراعظم آزاد جموں وکشمیر اوروزیراعلی گلگت بلتستان کو بھی مدعو کیا جائے ۔مشینیں، آلات اورعلاج معالجے کے لئے درکار ضروری طبی سامان بھی ہنگامی بنیادوں پر منگوایا جائے ،وزیراعظم کو صوبائی حکومتوں کے ساتھ مل کر یہ اقدامات اب تک کرلینے چاہئیں تھے ۔مشترکہ حکمت عملی مرتب کی جائے ورنہ صورتحال ہاتھ سے نکل جائے گی ۔ انہوں نے کہا کہ بیان بازی پر زوررکھنے کے بجائے اقدامات اور انتظامات پر توجہ دی جائے ،آگاہی کی قومی مہم چلائی جائے تاکہ شہریوں کو صورتحال میں رہنمائی میسرآئے ،چین سے کورونا سے نمٹنے کے انتظامات میں پیشہ وارانہ رہنمائی لی جائے ،ماہرین اور ڈاکٹرز کی ٹاسک فورس بنائی جائے تاکہ قومی پالیسی کی تشکیل ہوسکے ۔ انہوں نے کہا کہ قوم سے دعا کی خصوصی اپیل ہے کہ اللہ تعالی سب کو اس آفت سے محفوظ رکھے۔
