اسلام آباد (آن لائن ) اقوام متحدہ کے سیکرٹری جنرل انتونیو گوتریس بروز اتوار پاکستان پہنچیں گے اور 19 فروری تک پاکستان کا دورہ کریں گے۔ترجمان دفتر خارجہ کے مطابق انتونیو گوتریس اسلام آباد میں ہونیوالی افغان مہاجرین سے متعلق عالمی کانفرنس میں شرکت کریں گے اور جنرل کانفرنس سے کلیدی خطاب کریں گے۔دفتر خارجہ کے مطابق اقوام متحدہ کے سیکرٹری جنرل صدر مملکت عارف علوی اور وزیر اعظم عمران خان سے
بھی ملاقاتیں کریں گے، اس کے علاوہ وہ وزیر خارجہ شاہ محمود قریشی سمیت اراکین پارلیمنٹ سے بھی ملاقاتیں کریں گے۔ترجمان کا کہنا ہے کہ انتونیو گوتریس کو دورہ پاکستان کے دوران مسئلہ کشمیر پر پاکستان کے نقطہ نظر سے بھی آگاہ کیا جائیگا۔دفتر خارجہ کی جانب سے مزید کہا گیا کہ سیکرٹری جنرل اقوام متحدہ کی افغان مہاجرین سے متعلق کانفرنس میں شرکت پاکستان کی افغان مہاجرین کی فراخدلانہ میزبانی کا اعتراف ہے۔
