لاہور(این این آئی) پاکستان مسلم لیگ (ن) کے صدر و قائد حزب اختلاف شہبازشریف ین معاشی خطرات پر اظہار تشویش کا اظہار کرتے ہوئے کہا ہے کہ پاکستان کو دانستہ معاشی دیوالیہ پن کی طرف دھکیلا جارہا ہے،معیشت کی تباہی سے پاکستان کی سالمیت اندر سے کھوکھلی ہورہی ہے۔ اپنے بیان میں انہوں نے کہا کہ صحتمند ہوتی، دوڑتی معیشت کو کرپٹ ٹولے نے تباہ کر دیا ہے،سود کی شرح بڑھا کر کاروبار، روزگاراور بجلی گیس بڑھا کر عوام کا معاشی قتل عام کیاگیا،11000 ارب قرض ملک کو معاشی بیڑیوں

میں جکڑنے کے لئے لیاگیا جس کا قوم کو فائدے کے بجائے نقصان ہو۔ انہوں نے کہا کہ عوام تاجر اور سیاستدان معیشت بچانے کے لئے متحد اور تیار ہوجائیں،عوام اور ملک کا معاشی قتل مزید برداشت نہیں کیا جائے گا، حکومت معیشت کی گاڑی کو اندھے ڈرائیور کی طرح ریورس میں چلارہی ہے۔ انہوں نے کہا کہ وزیراعظم ہاؤس چوروں کی پناہ گاہ اور ملک کو عوام کی معاشی قتل گاہ میں بدل دیا گیا ہے،آٹا اور چینی چور وزیراعظم کی سرپرستی میں بے قصور تاجروں کو جیلوں میں بند کیاجارہا ہے۔