کراچی(این این آئی)قومی ایئرلائن کی نئی انتظامیہ کے اقدامات کے باعث پی آئی اے کے خسارے میں نمایاں کمی آ گئی ہے۔پی آئی اے ہیڈ آفس میں گزشتہ روز پی آئی اے بورڈ آف ڈائریکٹرز کا اجلاس منعقد ہوا، جس میں نئی انتظامیہ کے اقدامات پر بریفنگ دی گئی۔بتایا گیا کہ پی آئی اے کا 2019 کے پہلے 6 ماہ میں آپریشنل خسارہ 17 سے کم ہو کر 7 ارب رہ گیاہے۔بریفنگ میں بتایا گیا کہ ایئر مارشل ارشد ملک کی جانب سے اقدامات کے مثبت نتائج آنا شروع ہو گئے ہیں۔
پی آئی اے کے ریونیو میں 44 فی صد اضافہ ہوا، پی آئی اے کے خسارے میں 59 فی صد کی کمی ہوئی، کارگو اور بیگج کی مد میں بھی قابل ستائش اضافہ ہوا۔اجلاس میں بورڈ نے نئی انتظامیہ کے جانب سے خسارے میں کمی کے اقدامات کو بھی سراہا، بورڈ ممبران نے ہدایت کی کہ ای آر پی کی انکوائری جلد مکمل کی جائے۔ بورڈ نے پی ایس او کی جانب سے فیول کی فراہمی بند کرنے پر سرزنش کی اور دوسرے جہاز کی آمد میں تاخیر پر اظہار ناراضگی کیا گیا۔
