اسلام آباد (این این آئی) پاکستان تحریک انصاف کے رکن نے اپنی ہی حکومت پر پیسے لے کر نوکریاں دینے کا الزام دھر دیا۔ قومی اسمبلی کے اجلاس کے دور ان سردار ریاض نے کہاکہ پاکستان ریلوے میں راجن پور سے بھی 21 نوکریاں فروخت کی گئی، ڈیڑھ ڈیڑھ لاکھ میں نوکریاں بیچی گئیں، سب فراڈ ہوا ہے۔ سر دار ریاض نے کہاکہ اس حوالے سے مکمل فہرست بھی پیش کر سکتا ہوں۔اسپیکر قومی اسمبلی نے الزامات کی تحقیقات اور رپورٹ

پیش کرنے کا حکم دیدیا۔ اسپیکر نے کہاکہ سنگین الزمات لگائے گئے ہیں، تحقیقات کر کے رپورٹ پیش کی جائے۔ پارلیمانی سیکرٹری فرخ حبیب نے کہاکہ ہم نے میرٹ کی بنیاد پر نوکریاں دی، معزز رکن کی طرف سے جو الزامات لگائے گئے، اس کی تحقیقات کروائی جائیگی۔ فرخ حبیب نے کہاکہ اگر کوئی ملوث پایا گیا، تو کاروائی عمل میں لائی جائے گی۔ یاد رہے کہ سردار ریاض راجن پور سے پی ٹی آئی کے رکنِ قومی اسمبلی ہیں۔