اسلام آباد (این این آئی) پاکستان مسلم لیگ (ن) کے رکن قومی اسمبلی اظہر قیوم ناہرا نے پارلیمنٹ لاجز میں ہنگامہ آرائی کرتے ہوئے ڈائریکٹر پارلیمنٹ لاجز محمد طاہر پر حملہ کردیا، معاملہ سپیکر، ڈپٹی سپیکر قومی اسمبلی تک پہنچا دیا گیا، تھانہ سیکرٹریٹ میں لیگی ایم این اے کیخلاف قانونی کارروائی کیلئے درخواست بھی دیدی گئی۔ تفصیلات کے مطابق پیر کو پاکستان مسلم لیگ (ن) کے رکن قومی اسمبلی اظہر قیوم ناہرا نے پارلیمنٹ لاجز میں ہنگامہ آرائی کرتے
ہوئے ڈاریکٹر پارلیمنٹ لاجز محمد طاہر پر حملہ کر دیا۔رکن قومی اسمبلی نے ڈائریکٹر لاجز کو دھمکی دیتے ہوئے کہا کہ میرے کام فوری کرو ورنہ مزا چکھا دوں گا۔رکن قومی اسمبلی کی جانب سے ہنگامہ آرائی کرنے پر پولیس کو طلب کرلیا گیا جس پر وہ وہاں سے غائب ہوگئے۔ڈائریکٹر پارلیمنٹ لاجز نے معاملہ سپیکر اور ڈپٹی سپیکر قومی اسمبلی کو پہنچا دیا ہے۔تھانہ سیکرٹریٹ میں لیگی ایم این اے کیخلاف قانونی کارروائی کیلئے درخواست بھی دے دی گئی ہے۔
