اسلام آباد (نیوز ڈیسک) رمضان المبارک کی آمد کے ساتھ ہی سزائے موت کے قیدیوں کو ایک ماہ کا ریلیف مل گیا ہے۔ رمضان المبارک میں کسی بھی قیدی کو سزائے موت نہیں دی جائے گی اور عید الفظر کے بعد حکومت یورپی ممالک کے دباﺅ کے باوجود سزائے موت پانے والے قیدیوں کو تختہ دار پر لٹکانے کا سلسلہ شروع کرے گی۔ رمضان المبارک کی آمد کا سب سے زیادہ فائدہ اس وقت سزائے موت کے مجرم شفقت حسین کو ملا ہے جس کی پھانسی کے احکامات چار مرتبہ ملتوی ہوئے ہیں اور آخری بار پھانسی کی سزا پر اسرار طور پر ملتوی ہوئی جس کی حکومت تحقیقات کروا رہی ہے۔ حکومت نے دسمبر 2014ءسے لیکر اب تک 158 مجرموں کو پھانسی دی ہے حکومت نے آرمی پبلک سکول میں ہونیوالے دہشت گردی کے واقعہ کے بعد پھانسیوں پر سے پابندی ہٹا دی تھی اور آجکل یورپی یونین کی طرف سے ایک بار پھر پاکستان پر دباﺅ بڑھا دیا گیا ہے کہ پھانسیوں کا سلسلہ منقطع کیا جائے۔