لاس اینجلس (این این آئی)1960 کی دہائی میں مشہور ہونے والی امریکی سیریز ’ٹارزن‘ کے اداکار رون ایلی کی اہلیہ کو ان کے بیٹے نے قتل کر دیا ہے۔خبر رساں ادارے اے ایف پی کے مطابق امریکی ریاست کیلیفورنیا میں پولیس نے ایک بیان میں کہا ہے کہ انہیں ایک ہنگامی فون کال موصول ہوئی۔

جس کے بعد وہ رون ایلی کے گھر پہنچے جہاں انہیں 62 سالہ ویلیری لندین مردہ حالت میں ملیں۔پولیس کے مطابق ویلیری لندین کے جسم پر متعدد زخموں کے نشانات تھے۔پولیس کے مطابق واقعہ کے بعد رون ایلی اور ویلیری لندین کے بیٹے 30 سالہ کیمرون ایلی کی تلاش شروع کی گئی جو گھر کے باہر ملا تاہم اس نے ہدایات ماننے سے انکار کیا جس پر اسے اہلکاروں نے گولیاں ماریں۔پولیس کا کہنا تھا کہ 62 سالہ لندین کو چھریوں کے وار کر کے قتل کیا گیا تاہم 81 سالہ رون ایلی پر حملہ نہیں کیا گیا لیکن اہلکار احتیاطاً رون ایلی کو ہسپتال لے گئے۔کیلیفورنیا کے خبر رساں ادارے کے ٹی ایل کے مطابق کسی طبی مسئلے کی وجہ سے رون ایلی پولیس سے ٹھیک طرح بات نہیں کر پا رہے تھے۔ تاہم انہوں نے پولیس کو بتایا کہ ان کی اہلیہ کے قتل میں خاندان کا ایک اور فرد شامل تھا۔رون ایلی کے ویلیری لندین سے تین بچے ہیں۔ وہ ماضی میں ’خوبصورتی کی ملکہ‘ مقابلے میں سرفہرست رہی ہیں۔ٹارزن سیریز میں رون ایلی نے ایک ایسے شخص کا کردار ادا کیا ہے جو اعلیٰ تعلیم یافتہ ہوتا ہے لیکن لوگوں سے بیزاری کے باعث وہ جنگل میں جا کر رہنے لگتا ہے اور جہاں وہ شکاریوں اور دوسرے برے لوگوں سے لڑتا ہے۔ایک امریکی اخبار شارلٹ ابزرور کے مطابق رون ایلی نے اپنے خاندان کے ساتھ وقت گزارنے کے لیے ٹیلی ویڑن اور فلموں کے کیریئر سے لمبی چھٹی لی تھی۔حال ہی میں انہوں نے 2014 کی فلم ’ایکسپکٹنگ آمش‘ میں کام کیا تھا۔