اسلام آباد(نیوزڈیسک گرم موسم انسان کے لئے بہت سے مسائل کا سبب بن جاتا ہے لیکن مصر میں گرمی کی وجہ سے ایک جوڑے کا گھر ٹوٹنے کا خدشہ پیدا ہو گیا ہے۔اخبار الیوم ا لسبیعہ کے مطابق مصری دارلحکومت سے تعلق رکھنے والی نوجوان خاتون ناہید نے مشرقی قاہرہ کی ایک عدالت میں درخواست دی ہے کہ اس کا کنجوس خاوند شدید گرم موسم کے باوجود پرانا ائر کنڈیشنر بدلنے پر تیار نہیں لہٰذا اسے طلاق دلوائی جائے۔ خاتون کا کہنا ہے کہ اس کا خاوند ڈاکٹر ہے اور اسے کسی قسم کا مالی مسئلہ نہیں لیکن اس کے باوجود نیا اے سی نہ لگوانا محض کنجوسی ہے۔ خاتون نے شدید گرمی کو اپنے اور اپنے تین بچوں کے لئے ناقابل برداشت قرار دیتے ہوئے طلاق کا مطالبہ کر دیا ہے۔ اس کا یہ بھی کہنا ہے کہ خاوند نے اپنے والدین کے گھر میں نیا اے سی لگوایا ہے لیکن اپنی بیوی اور بچوں کے لئے نیا اے سی لگوانے پر تیار نہیں ہے۔ عدالت کی طرف سے مفاہمت کی کوشش ناکام ہونے کے بعد مقدمے کی سماعت اگست تک کے لئے ملتوی کر دی گئی ہے۔ مذکورہ جوڑے کی شادی کو 13 سال ہو چکے ہیں۔

مزید پڑھئے:انٹر نیٹ پر اپنا جیون ساتھی ڈھونڈنا لڑکی کو۔۔۔۔۔۔۔۔۔۔