اسلام آباد(نیوزڈیسک ) شیونگ فوم سے مرد داڑھی بناتے ہیں لیکن آج ہم آپ کو فوم کے ایسے فوائد بتائیں گے جسے جان کر آپ حیران رہ جائیں گے۔
جیولری صاف کرنے کے لئے
وقت گزرنے کے ساتھ ساتھ جیولری کی چمک کم ہوتی جاتی ہے جس کی وجہ سے اس کی خوبصورتی ماند پڑنے لگتی ہے لہذا اسے آپ شیونگ فوم سے صاف کریں اور دیکھیں کہ بہت جلد وہ چمکدار ہوجائے گی۔
شیشوں کی دھند کے لئے
اکثر ہوا کی نمی، سردی اور موسمیاتی تغیرکی وجہ سے غسل خانے اور کھڑکیوں کے شیشے دھندلے ہوجاتے ہیں جس کی وجہ سے دیکھنے میں کافی دقت پیش آتی ہے۔ایسے میں اگر شیشے پر فوم کو لگادیا جائے تو وہ چمکدار اور صاف ہوجائیں گے۔
قالین سے داغ مٹانے کے لئے
اکثر قالین پر کھانے پینے ،چائے یا کافی اور چکنائی کے داغ دھبے لگ جاتے ہیں اور اگر مہمان آئیں تو ایسی صورت میں بہت شرمندگی اٹھانا پڑتی ہے لیکن اگر آپ فوم کا استعمال کرتے ہوئے قالین کو صاف کریں تو تمام ایسے نشانات مٹ جائیں گے۔
اوون صاف کرنے کے لئے
کھانا پکاتے ہوئے چکنائی اور سالن کے ضدی نشانات لگ جاتے ہیں اور باوجود کوشش کے اگر یہ صاف نہ ہورہے ہوں تو آپ کو چاہیے کہ شیونگ فوم کو آزما کر دیکھیں اور بآسانی ان سے نجات پالیں۔
نل اور شاور کی صفائی کے لئے
اکثر نلوں اور شاور پر پانی کی وجہ سے نشانات پڑ جاتے ہیں جس کی وجہ سے وہ کافی گندے لگتے ہیں۔لیکن اگر آپ ان پر فوم لگا کر کسی کھردری چیز یا لوہے کی جالی سے رگڑیں تو وہ صاف اور چمکدار ہوجائیں گے۔
کپڑوں سے نشانات مٹانے کے لئے
اگر کپڑوں پر گھاس، چائے یا سالن کے نشانات لگ جائیں تو دھونے سے قبل ان پر فوم لگا کر آدھ گھنٹہ چھوڑ دیں اور پھر دھو لیں،تمام نشانات ختم ہوجائیں گے۔