کراچی (این این آئی)پاکستان کی نامور اداکارہ صبا قمر نے بھارتی جاسوس کلبھوشن یادیو کی زندگی پر مبنی فلم کا حصہ بننے کی افواہوں کو بے بنیاد ٹھہرا دیا۔خبریں تھیں کہ اداکارہ بھارتی جاسوس کی زندگی پر مبنی فلم میں اہم کردار نبھاتی نظر آئیں گی، البتہ اداکارہ نے سماجی رابطے کی ویب سائٹ ٹوئٹر پر انکار کرتے ہوئے لکھا کہ وہ ایسی کسی فلم کا حصہ نہیں بن رہیں۔
اپنی ٹویٹ میں اداکارہ نے لکھا کہ مجھے ہمیشہ یہ بات کافی مزاحیہ لگتی ہے کہ میں پتہ نہیں کون کون سی فلمیں سائن کرلیتی ہوں جن کی مجھے خبر بھی نہیں ہوتی۔صبا قمر کے مطابق ایمانداری سے، اگر میں کوئی فلم کروں گی تو خود اس کا اعلان کروں گی، میں اس لیے ہی یہاں ہوں، میں اس وقت صرف کملی فلم کررہی ہوں، اس لیے ایسی جھوٹی خبریں ریٹنگ کی خاطر شیئر کرنا بند کریں۔
