لاہور (این این آئی) ہدایت کار احتشام الدین نے کہاہے کہ فلم سپر اسٹار بنانا دیرینہ خواب کی تکمیل ہے۔ ایک انٹرویومیں معروف ڈرامہ سیریل آنگن اور سپر اسٹار پہ بیک وقت کام کرنے سے متعلق انہوں نے کہا کہ مجھے سپراسٹار کی ہدایتکاری کے لیے جب کال موصول ہوئی تو میں آنگن پر کام کر رہا تھا۔میں پیشکش کے بعد مخمصے کا شکار ہو گیا کہ دونوں پراجیکٹس کے ساتھ انصاف کیسے کر پاؤں گا۔ مگر خدا کا شکر ہے کہ فلم کی باضابطہ عکس بندی سے قبل اور اس کے بعد کی گئی محنت نے فلم کو ایسا بنا دیا جیسا میں اور سمیع خان بنانا چاہتے تھے۔

انہوں نے کہاکہ فلم کے ڈائیلاگ نکھارنے میں مصطفی آفریدی نے اہم کردار ادا کیا ہے۔ ان ہی کی بدولت ہمیں تماشہ ہے تو تماشہ ہی سہی جیسے ڈائیلاگز سننے کو ملے۔اذان سمیع خان کی تعریف کرتے ہوئے انہوں نے کہا کہ ان کی والدہ زیبا بختیار نے مجھے ہدایتکاری کی طرف آنے کی ترغیب دی تھی اور اب ان کا بیٹا اس انڈسٹری کے لیے ایک عظیم اثاثہ ثابت ہورہا ہے۔فلم سپراسٹار میں نامی گرامی ناموں کے ساتھ کام کرنے کے حوالے سے ان کا کہنا تھا کہ ندیم بیگ جیسے بڑے اداکاروں کے لیے ہدایتکاری کرنا میرے لیے بہت بڑے اعزاز کی بات ہے۔

موضوعات:احتشام الدین