خالق نگر(این این آئی)پاکستان فلم انڈسٹری کے معروف فلمسازچودھری سلیم باجوہ نے کہا ہے کہ مظلوم کشمیریوں کے حقوق کو سلامتی کونسل نے بھی تسلیم کر لیا ہے ،کشمیر بھارت کا داخلی معاملہ نہیں ہے ،انہوں نے کہا کہ بھارت مقبوضہ کشمیر میں فوجی جارحیت کے ذریعے کشمیری عوام کا بنیادی حق سلب نہیں کرسکتا،کشمیری عوام کی برسوں سے جاری پرامن تحریک صرف حق خود ارادیت کیلئے ہے ، چودھری سلیم باجوہ نے مزیدکہا کہ مسئلہ کشمیر حل ہوئے بغیر خطے میں امن اور استحکام پیدا نہیں ہوسکتا، عالمی برادری کشمیری عوام کی آزادی اور
خطے میں پائیدار امن کیلئے اپنا کردار ادا کرے۔معروف فلمسازکا مزیدکہنا تھا کہ بھارتی وزیراعظم نریندرمودی نے اپنے ایک ہی اقدام سے پوری دنیاکواپنامکروہ چہرہ دکھاکر گزشتہ 72سال سے کشمیرپرپاکستان کے موقف کی تائیدکردی ہے ،بھارت کشمیر پرغیر قانونی اور ظلم و جبر سے قبضہ کرنے کی کوشش کررہا ہے جس میں اسے ناکامی کے سوا کچھ حاصل نہیں ہوگا۔ اقوام متحدہ کی سلامتی کونسل میں کشمیرپربحث ہوناپوری قوم کی عظیم جیت ہے۔انہوں نے کہا کہ بھارت مظلوم کشمیریوں پر ظلم بند کرے پاکستان کا بچہ بچہ مظلوم کشمیر یوں کیلئے خون کے آخری قطرے تک جدوجہد کرے گا۔
