لاہور(نیوزڈیسک)قومی کرکٹ ٹیم کے ٹیسٹ کپتان مصباح الحق نے کہاہے کہ ملک میں انٹرنیشنل کرکٹ کی بحالی کا تسلسل ہونا چاہئے .پاکستان میں جس طرح انٹرنیشنل کرکٹ ہوئی آئی سی سی نے بھی دیکھی اور اسے بھی نظر ثانی کرنی چاہئے .دورہ سری لنکا کے دوران مشکلات پیش آ سکتی ہیں۔ میزبان ٹیم کو ہوم گراو نڈ کا فائدہ ہو گا۔ میڈیا سے گفتگو کرتے ہوئے مصباح الحق نے کہا کہ شائقین نے شدید گرمی کے باوجود پاک زمبابوے میچ دیکھے، انہیں سلام پیش کرتا ہوں، ملک میں انٹرنیشنل کرکٹ کی بحالی میں پی سی بی، حکومت اور زمبابوے ٹیم کے ساتھ ساتھ شائقین کا بھی بڑا ہاتھ ہے۔ مصباح الحق نے کہاکہ سری لنکا ہوم سیریز میں آسان نہیں بلکہ مشکل حریف ثابت ہوتا ہے۔مصباح الحق نے کہا کہ زمبابوے کے ساتھ کامیاب سیریز پر پوری قوم مبارکباد کی مستحق ہے، انٹرنیشنل کرکٹ کی بحالی کیلئے زمبابوے کی طرح دیگر ٹیموں کو بھی پاکستان آنا چاہیے۔مصباح الحق نے آئی سی سی کی صدارت کے لئے ظہیر عباس کے انتخاب کو درست قرار دیتے ہوئے کہا کہ ظہیرعباس قومی ہیرو ہیں ان کی ملک کے لئے بڑی خدمات ہیں۔قومی ٹیسٹ ٹیم کے کپتان نے کہا کہ دورہ سری لنکا کے دوران مشکلات پیش آ سکتی ہیں۔ میزبان ٹیم کو ہوم گراو نڈ کا فائدہ ہو گا لیکن ہم بھی اچھی کرکٹ کھیلیں گے-