لاہور(این این آئی)آل پاکستان انجمن تاجران کے صدر اشرف بھٹی نے حکومت کی جانب سے اپوزیشن کی میثاق معیشت کی پیشکش پر پیشرفت کے اعلان کو خوش آئند قرار دیتے ہوئے کہا ہے کہ قرضے اور امداد صرف ’’پین کلر ‘‘ ہیں ہمیں معیشت کو پائوں پر کھڑا کرنے کیلئے اصلاحات اور اپنے وسائل پیدا کرنا ہوں گے۔ ان خیالات کا اظہار انہوںنے مختلف مارکیٹوں کے تاجروں پر مشتمل وفد سے ملاقات میں گفتگو کرتے ہوئے کیا ۔
اس موقع پر تاجرنمائندوںنے تجارتی مراکز کے دیرینہ مسائل سے بھی آگاہ کیا ۔ اشرف بھٹی نے کہا کہ قائد حزب اختلاف محمد شہباز شریف اور سابق صدر مملکت آصف علی زرداری کی جانب سے میثاق معیشت کی پیشکش انتہائی خوش آئند ہے جس سے حکومت کو فائدہ اٹھانا چاہیے ۔ معیشت کی ترقی کیلئے تمام اسٹیک ہولڈرز کی مشاورت سے قومی پالیسی تشکیل دی جائے جس پر حکومتوں کی تبدیلی کے اثرات مرتب نہ ہوں اور یہ اپنی سمت میں گامزن رہے ۔اشرف بھٹی نے کہا کہ قرضوں اور امداد سے کبھی بھی معیشت ترقی کر سکتی ہے اور نہ ہم خود مختار ہو سکتے ہیں اس لئے ہمیں سب سے پہلے قرضوں سے چھٹکارا حاصل کرنا ہوگا ۔ معیشت کو پائوں پر کھڑا کرنے کیلئے اصلاحات متعارف کرائی جائیں اور اپنے وسائل پیدا کئے جائیں جس کیلئے آمدنی کے نئے ذرائع تلاش کرنا ہوں گے۔انہوں نے مزید کہا کہ صرف بڑے شعبوں کے مسائل کو حل کرنا حکومت کی ترجیح ہے جبکہ تاجر وں او ران کے مسائل کو یکسر نظر انداز کیا جاتا ہے ۔تجاوزات کے خاتمے اور پارکنگ پلازوں کی تعمیر کے دیرینہ مطالبات پر کوئی عمل نہیں کیا گیا جس کی وجہ سے تاجروں کے کاروبار تباہ ہو رہے ہیں ۔
