مانچسٹر(آن لائن) قومی ٹیم کے کپتان سرفراز احمد کی بھارت کے خلاف اہم ترین میچ کے دوران جمائیاں لینے کی وجہ سامنے آگئی۔ تفصیلات کے مطابق بھارت کے ہاتھوں ورلڈکپ کے میچ میں شکست کے بعد سے قومی ٹیم میں اختلافات کی مختلف خبریں سامنے آ رہی ہیں، ایک رپورٹ کے مطابق سرفراز احمد بھارت کیخلاف کھلائی جانے والی ٹیم سے خوش نہیں تھے۔
سرفراز احمد قومی ٹیم کے سینئر آل راؤنڈر شعیب ملک اور عماد وسیم کو بھارت کیخلاف میچ میں موقع دینے کے حق میں نہیں تھے اور ان کی جگہ محمد حسنین اور آصف علی کو کھلا نا چاہتے تھے تاہم ہیڈ کوچ مکی آرتھر اور چیف سلیکٹر انضمام الحق شعیب ملک اور عماد وسیم کو بھارت کیخلاف میچ کھلوانے کے حق میں تھے۔ اسی باعث میچ سے قبل رات کو قومی ٹیم کے کپتان، ہیڈ کوچ اور چیف سلیکٹر کے درمیان طویل بحث ہوئی اور سرفراز احمد کو ہیڈ کوچ اور چیف سلیکٹر کے فیصلے کے سامنے سر تسلیم خم کرنا پڑا۔ذرائع کے مطابق پوری رات جاگنے کے باعث سرفراز احمد میچ کے دورا ن جمائیاں لیتے نظر آئے۔ یاد رہے کہ پاک بھارت میچ میں پاکستانی ٹیم نے انتہائی ناقص کارکردگی دکھائی اور پاکستان بری طرح میچ ہار گیا، میچ سے پہلے قومی کرکٹ ٹیم کے کھلاڑی سیر سپاٹے کرتے رہے اور نیند بھی پوری نہیں کی تھی،کچھ کھلاڑی بھارت کے ساتھ میچ سے پہلے سیر سپاٹے اور پارٹی کرتے رہے۔ اس حوالے سے ایک ویڈیو وائرل ہوئی ہے، وائرل ہونے والی تصویر اور ویڈیو میں دیکھا جاسکتا ہے کہ شعیب ملک کے ساتھ امام الحق، وہاب ریاض اور ثانیہ مرزا رات گئے تک شیشہ بار میں موجود ہیں۔
