اسلام آباد (این این آئی)پاکستان مسلم لیگ (ن )نے ججز کے خلاف ریفرنسز پر پارلیمنٹ کے اندر احتجاج کا فیصلہ کر لیا۔ جمعہ کو مسلم لیگ (ن )کے مشترکہ ایڈوائزری گروپ کا اجلاس ختم ہوا جس میں ججز کے خلاف ریفرنسز پر پارلیمنٹ کے اندر احتجاج کا فیصلہ کیا گیا ۔مسلم لیگ (ن )کے رہنما اور سابق اسپیکر قومی اسمبلی ایاز صادق کا اس حوالے سے کہنا ہے کہ

یہ ریفرنسز عدلیہ پر قدغن لگانے کے مترادف ہیں۔انہوں نے کہا کہ عدلیہ پر کسی کو حملہ کرنے کی اجازت نہیں دیں گے، ریفرنسز کے خلاف نون لیگ نے اصولی موقف اپنانے کا فیصلہ کیا ہے۔سابق اسپیکر ایاز صادق نے کہا کہ ریفرنسز کے خلاف احتجاج کا ہر آپشن استعمال کریں گے۔واضح رہے کہ سابق وزیراعظم نواز شریف نے گزشتہ روز کوٹ لکھپت جیت میں اپنی صاحبزادی مریم نواز اور دیگر پارٹی رہنمائوں سے ملاقات میں ججز کے معاملے پر زور دیا تھا کہ (ن )لیگ اس حوالے سے حکمت عملی بنائے جبکہ انہوں نے اپیل کی تھی کہ عوام عدلیہ بچائو تحریک کیلئے باہر نکلیں۔نواز شریف کے مطابق جمہوریت پسند ججز کو چن چن کر نشانہ بنایا جا رہا ہے، قوم عدلیہ بچائو تحریک کیلئے باہر نکلے، جو اس تحریک میں شامل نہیں ہوگا اسے قوم معاف نہیں کرے گی۔انہوں نے کہا کہ حکومت نے قومی غیرت کا جنازہ نکال دیا ہے، اب بس ہو گئی ہے، جس طرح حکومت نے میڈیا کو یرغمال بنایا ہے اب ججز کے خلاف ریفرنس لا رہی ہے،اتنے پاک صاف کردارکے حامل ججزکی ٹارگٹ کلنگ کی جا رہی ہے۔

موضوعات:ایاز صادق ججز کے خلاف ریفرنسز